Kompetanseutvikling er ein grunnleggjande føresetnad for at Lom og Skjåk kommune skal kunne tilby trygge, samordna og kunnskapsbaserte tenester til barn, unge og familiar. Arbeidet tek utgangspunkt i måla i Oppvekstreforma om tidleg innsats, førebygging, samhandling og heilskapleg støtte rundt barnet.
Gjennom systematisk læring, refleksjon, fagleg oppdatering og tverrfagleg samarbeid skal kommunane utvikle tenester som møter behova til barn, unge og familiar på ein tidleg, koordinert og inkluderande måte. Kompetanseutvikling handlar ikkje berre om den enkelte medarbeidaren sin kompetanse, men òg om organisasjonen si evne til å lære, samarbeide og kontinuerleg forbetre praksis.
Kompetanseheving og lærande organisasjon
Lom og Skjåk kommune skal vere lærande organisasjonar der kunnskap vert delt, utvikla og omsett til handling. Kommunane skal leggje til rette for fagleg utvikling, erfaringsdeling og refleksjon både innanfor og på tvers av tenesteområda.
For å lykkast med tidleg innsats og heilskaplege tenester må dei tilsette ha kompetanse til å:
- oppdage og identifisere bekymringar tidleg
- møte barn, unge og familiar med respekt og medverknad
- samarbeide tverrfagleg og tverrsektorielt
- arbeide kunnskapsbasert
- styrkje beskyttande faktorar og redusere risikofaktorar rundt barnet
- nytte BTI-modellen som felles arbeidsform i oppfølging av barn, unge og familiar
Regionalt samarbeid om kompetanseutvikling
Lom og Skjåk kommune deltek aktivt i det regionale samarbeidet i Nord-Gudbrandsdal (6K) knytt til Oppvekstreforma. Gjennom regionale nettverk, erfaringsdeling og felles kompetansetiltak skal kommunane utvikle ei felles forståing av førebygging, tidleg innsats og tverrfagleg samarbeid.
Det regionale samarbeidet skal bidra til:
- styrkt fagkompetanse på tvers av kommunane
- meir robuste fagmiljø
- betre samhandling mellom tenestene
- felles språk og metodikk, samt etablering og bruk av felles verktøy
- auka kvalitet i tenestene til barn, unge og familiar
Gjennom det regionale samarbeidet i 6K skal kommunane byggje profesjonelle læringsfellesskap på tvers av kommunegrenser. Felles kompetansetiltak, nettverk, utviklingsarbeid og erfaringsdeling skal bidra til å styrkje både den individuelle kompetansen og organisasjonane si samla evne til læring, innovasjon og kvalitetsutvikling. Slik vert regionen meir robust i arbeidet med å møte framtidige utfordringar innan oppvekstfeltet.
Profesjonelle læringsfellesskap og utviklingsarbeid
Lom og Skjåk kommune skal utvikle og vedlikehalde sterke profesjonelle læringsfellesskap i alle tenester som arbeider med barn og unge. Eit profesjonelt læringsfellesskap er kjenneteikna ved at tilsette og leiarar samarbeider systematisk om å utvikle praksis, dele erfaringar, reflektere over eigen verksemd og ta i bruk forskings- og erfaringsbasert kunnskap til beste for barn og unge.
Kompetanseutvikling skal ikkje berre vere knytt til kurs og opplæring, men vere ein integrert del av det daglege arbeidet gjennom refleksjon, samarbeid, rettleiing, evaluering og felles læring. Målet er å styrkje kvaliteten på tenestene og sikre at ny kunnskap vert omsett til praksis.
I samsvar med opplæringslova skal skulen arbeide kontinuerleg med kvalitetsutvikling for å fremje læring, utvikling, trivsel og inkludering for alle elevar. Skuleeigaren og skulen skal byggje utviklingsarbeidet på kunnskap om læringsmiljø, læringsresultat, elevane sine erfaringar og profesjonelle vurderingar. Utviklingsarbeidet skal vere systematisk og involvere både leiarar, tilsette, elevar og føresette.
Gjennom profesjonelle læringsfellesskap skal kommunane styrkje:
- kollektivt ansvar for utvikling og læring
- delingskultur og erfaringsutveksling
- refleksjon over eigen praksis
- bruk av forskingsbasert og erfaringsbasert kunnskap
- samanhengen mellom kompetanseutvikling og kvalitetsutvikling
- evna til kontinuerleg forbetring på individ-, teneste- og systemnivå
Dette samsvarer med måla i Oppvekstreforma om at tenestene skal samarbeide tettare, lære av kvarandre og utvikle meir samordna og berekraftige løysingar for barn, unge og familiar.
Relasjonell kapasitet og samarbeid
God kvalitet i tenestene er avhengig av både fagkompetanse og evna til å samarbeide. Lom og Skjåk kommune legg difor vekt på utvikling av relasjonell kapasitet, forstått som evna til å skape gode samarbeidsrelasjonar på tvers av fag, tenester og organisatoriske grenser.
Gjennom arbeid med Joint Action, Visma Flyt Samspel og BTI skal kommunane styrkje:
- tillit mellom tenestene
- felles ansvar for barn og unge
- samordna arbeidsprosessar
- koordinert innsats rundt familiar
- læring på tvers av fagområde
Målet er at barn, unge og familiar skal oppleve samanhengande tenester der dei møter kommunar som samarbeider om løysingane framfor å arbeide i separate system.
Felles retning for oppvekstarbeidet
I tråd med dei førebyggande oppvekstplanane i Lom og Skjåk skal alle tenester ha eit felles ansvar for å fremje gode oppvekstvilkår, førebyggje utanforskap og sikre at barn, unge og familiar får rett hjelp til rett tid. Arbeidet skal vere prega av heilskapleg tenking, tverrfagleg samarbeid, medverknad og kunnskapsbasert praksis. Kommunane skal ha møteplassar, rutinar og system som legg til rette for samhandling, tidleg oppdaging og koordinert oppfølging av barn, unge og familiar.
Denne forståinga skal liggje til grunn for alt kompetanse- og utviklingsarbeid i oppvekstsektoren og i dei tenestene som møter barn, unge og familiar.